1
- يقال ان رجلا دخل بت الشيطان فوجد ثلاثة اشياء.. مكنسة ومهفة وشيشة عسل سأله ماذا تعني؟
- ياكل الفقير فاقوم انا بكنس معدته فيعود جائعا..
- يصلى المومن في طقس يذيب العقول فاقوم واهفي له حتى ينام ويتسى صلاته..                
- اما العسل فاطعمه لابن الفكر فيذوق حلاوته. فينسى القيم والاخلاق     
                                    2            
يظهر ان حفيد الفيلسوف "هيجل" *وضع مجلس الحواسم فوق القانون بعد ان اخضع المواطن خضوعا كاملا لسلطته و قام سيادته بأحالة مقاولة لاكساء شوارع باعلان شخصي مباشر بمبلغ تافه قدره" 440 مليار دينار عراقي ".. معللا بان السيد المحافظ همّش ذلك. ثم راح يقرا مطولة بوطنيته.. وخلال جلسة الحوار - نطت - عضو المجلس وهي تتغشى بالفوطه والماشه والفركيته.. متدخلة على هواها لتتكلم عن 17 مليار دينار ثمن -سبيس– بينما السيد مذيع الشرقية ينهرها على المقاطعه.. قائلا.. اكلج اكعدي راحه..-كوره دانشه.. بانتظار ان يلصم البرنامج بقصيدة شعبية رخوه..
وانتهي البرنامج وطارت المليارات..
                                  3

فراشّه.. عضو مجلس بلدي.. لكت الباكالوريوس اباب المدرسة فاصبحت برلمانيه تمثل امتنا النائمة.!
اشراح تخطط لخريجي الجامعات وقد تحولوا الى باعة للرقي والكلبكس.. ستعلمهم بالتاكيد شلون يكنسون المدارس.. شنريد بعد اكثر؟
                                          4
سقط الاول وهو يمشي في ممرات تايمس سكوير والثاني سقط على وجهه خلال خروجه من معرض حلويات وتراكض الحواريون.. لا كلشى ماكو تره.. اكل لبلبي.. شرب نركيله وماعون بقلاوه..
الا انني رايت-الحشاشان- ينظران حولهما بلقطة اقرب لنظره الطائر زائغة في الجهات الاربعة.. وين مكافحة المخدرات؟
                                      5
* ان تركض بسيارتك التي يتراوح سعرها "50 مليون دينار" وتفوج بين المحرومين وانت تحمل- قزان- ابو عراوي.. للحصول على القيمه المجانية بمناسبة استشهاد سيدنا الحسين.. اشو كت راح يشبع الحراميه وتتوقف مكنسة الشيطان عن كنس شراهتهم..؟
                                     6
*550 مليون دينار خرجيه وخاوات ستدفع لانتخاب مجالس الحواسم.. عفوا مجالس المحافظات التي نصبت من اجل الفرهود.. مو من الانصاف احسن.. لو سوينه معمل للنفايات او رحلات للاطفال القاعدين على الارض.. .
                                     7
يقول عباس السوداني.. نقيب معلمي العراق.. عن وجود 8 ملايين امي!!
- استاذ.. ماسمعت مناقصة ال 6 مليارات لبناء مدارس في -منطقه القبلة- شوف المعادلة -اربعة مليارات النه واثنين مليار لك.. يعجبك يعجبك واذا ما يعجبك.. يفتح الله..؟
                                    8
طمع ساده..
- عمي ابو عزيز.. صيروا بالسره.. الخيرات هوايه. اشدعوه مستعجلين؟
- اي مد تشوف- السيد -بقلاواية بحلكه او وحدة بيده ومجلب بالصينيه..!
                                      9 
مقبرة الشريف..استثمار
وصل استثمار المقابر..-البعكوبة-.. بعد مقبرة السلام.. اكول حتى الموتى مخلصوا من افة النهب والسلب والاستثمار..
                                     10
مشهد لا يتكرر-مغوار -من "سوات"* تسحله العشاير.. و-عقيد مرور -تدهسه سياره.. ومواطن.. يعدم ويصور بالموبايل.. هاي وين وصلنه؟
                                         11
- ما كاد يسمع حديث المغدورين والمغيبين الذين يبلغ تعدادهم 12 الف حسب تقرير الامم المتحدة حتى صاح – الكاكا- بوجهه المفترس.. لا خوش صندقجه أمبرجمه ومغلفة.. سؤالك هذا بمناسبة الانتخابات.. هذا حجي مغرض..؟
- زين.. متكلي شنو –مديرية اسمها النواحي والاقضية.. في كركوك؟ وعاد الوجه المفترس يدافع عن الجريمة.. يا جماعة ما كو واحد يلخمه عله حلكه لو الزلم لبست عبي؟
                       12
لا.. تره السيد مو مرتشي. معاذ الله.. زين تريده يطلع بالتلفزيون وما بيده سبحه باي زهر لو كهرب يماني اي مو حرام.
                                         13
قال نائب مسيحي كردي.. في قرية الحمدانية..
-حشد شعبي.. شبكي.. كردي. ديني .عربي.. يزيدي..
شوفلي منو يقرا ومنو يسمع..؟
                                          14
امر رئيس الفيليبين.. برمى احد المرتشين من الطائرة.. عفا احنه العراقيين ايريدنه -اير باص. مؤجر  
لا.. ايريدنه ميت باص.. حته نشمر بالحراميه من الطيارات..
                                           15
مقابلة تلفزيونية..
- اني.. ويه الجمهورية المسلمة.
- والعراق وسوريا ومصر شنو دول كافره- زين والوطن؟
- شوف واحد ينطيك كلاص مي تاخده لو لا؟.
 فرد المذيع.. اذ جنت عطشان.
معليه من ذلك.. زين اريد منك الموقف؟
- الموقف هو بين الشيش والدوبيش؟
مالح وطيب لبلبي..
                                         16
دار السيد مأمونه..؟
عشرة صناديق سر مهر.. مليانه مليارات من الدنانير. تساوى ميزانيات الاردن والسودان ومصر ولبنان كمشوها بدبي.. مرت مر السحاب وذابت من الفضائيات العراقية بقدرة قادر..
- وصلنه لو بعد.. بعد شويه للجعب..!
                                          17
وصية..
مرحي يا قائدنا.. شلو شلو.. الطوب احسن لو مكواري.. الله يخلي" الريس.."
قال الطبيب النفساني.. انت مصاب بالكابة والسوداوية وفقر الدم والضغط العالي.. والتيه واذا – استمريت- على سماع الفضائيات العراقية لو راح يكودوك للشماعية لو تصاب بالزهايمر لو تصير حشاش؟
                                           18
اكول -المعلقين العراقيين- اعتادوا استعمال.. اللوب السينمائي.. وهم يجترون الكابينة والكتل والمحاصصة وهم ينقرون السبحة.. وكلما دار اللوب ازدادت الدولارات..
                                          19
ساحة الطيران.. ومدخل شارع سيد امين.. شلح واعبر.. شوكت اتصير فلكه وترفك لايت.. وشوكت يتوقف استهتار ركاب الماطورات والبايسكلات وهم يفوجون بين السيارات عرض وطول..

                                      *****